Bures boahtin min skuvlla oahppin.

Skuvla álgá vuossárgga 19.08.19 dii. 10.00. Buohkat bohtet kantiidnii gos lea oanehis bures boahtin -sárdni ja dáiddalaš ovdanbuktin. Dan maŋŋil čuvvot luohkkáteamat main leat mielde gulahallanoahpaheaddji ja guokte fágaoahpaheaddji, luohkáid luohkkálanjaide.

Doppe oaččut e.e. diibmoplána ja dieđuid dan birra mii galgá dáhpáhuvvat álgoskuvlabeivviid. Skuvla guossoha beaivvi mielde nisoláibbážiid ja káfe/teaja/kakao. Borramuš lea nuvttá.

Eará guovlluid oahppit geat dárbbašit orrunsaji fertejit farggamusat váldit oktavuođa skuvllain. Skuvllas lea verddebearašortnet mii sihkkarastá oadjebas ja hálbbes orrunfálaldaga.

Loga eambbo dán birra oahppigirjjážis.

Jo1-oahppit galget idjadanmátkái vuosttas vahkus. Danne lea dehálaš ahte eará guovllu oahppit váldet mielde bivuid/meahccebiktasiid, lávkka, oađđinseahka ja oađđinvuloža.

Skuvla lea ráhkadan oahppigirjjáža mas sáhtát gávdnat ollu ávkkálaš dieđuid skuvlla birra ja mo lea oahppin leat. Girjjáš lea mielddusin. Váldde mielde oahppigirjjáža vuosttas skuvlabeaivvi!

Deavdde skovi “Oahppidieđut” – sádde dan skuvlii dahje váldde dan mielde vuosttas skuvlabeaivvi. Atte dan iežat gulahallanoahpaheaddjái dahje buvtte dan skuvlla ovdakántuvrii. Lea dehálaš ahte skuvllas leat dát dieđut du birra.

Jus dattege it váldde vuostá skuvlasaji, de atte dieđu skuvlii dan birra e-poastta dahje telefovnna bokte.

Buorre geassi ain!

Dearvuođaiguin

Synnøve Solbakken-Härkönen
rektor