fjernundervisning 02Sámi joatkkaskuvla Kárášjogas fállá gáiddusoahpahusa davvisámegielas ohppiide miehtá Norgga. Gáiddusoahpahus lea oahpahusmálle mii čađahuvvo Skype dahje govva ja jietna studio bokte.

Olu oahppit geain lea riekti sámegieloahpahussii orrot báikkiin gos eai leat sámegieloahpaheaddjit ja sámegielgelbbolašvuohta. Skuvllain gos ii fállo sámegieloahpahus leat geatnegahtton fállat molssaevttolaš oahpahusvuogi nugo gáiddusoahpahusa, intensiivaoahpahusa, hospiterema dahje eará heivvolaš oahpahusvuogi.
Riekti sámegieloahpahussii lea lahkavuođđuduvvon oahpahuslagas 6.kap. Molssaevttolaš oahpahusvuohki lea lahkavuođđuduvvon láhkaásahusas §7-1 oahpahuslagas.

Don gii álggát joatkkaskuvlii gos eai fála oahpahusa davvisámegielas galggat áinnas váldit oktavuođa Sámi Joatkkaskuvllain Kárášjogas. Mii leat dás din várás.